Awduron wrth eu Gwaith 2026

Rhaglen datblygu creadigol ar gyfer talent newydd o Gymru ydy Awduron wrth eu Gwaith 2026, sydd yn cael ei chynnal yng Ngŵyl y Gelli, y Gelli Gandryll, gyda chefnogaeth Llenyddiaeth Cymru, a Folding Rock, ac sydd yn cael ei hariannu gan Gyngor Celfyddydau Cymru.

Mae Awduron wrth eu Gwaith Gŵyl y Gelli yn cynnig deg diwrnod o gyfleoedd datblygu creadigol wedi'u rhaglennu'n llawn, sydd yn caniatáu i'r awduron dethol i gymryd rhan yn nigwyddiadau'r Ŵyl, a mynychu gweithdai gyda chyhoeddwyr, asiantiaid ac, yn hollbwysig, gydag artistiaid rhyngwladol sefydledig.

Mae'r cyfranogwyr hyd yma wedi ennill nifer o wobrau ac wedi cyrraedd nifer o restrau byrion, gan gynnwys Gwobr Ryngwladol Dylan Thomas, Llyfr y Flwyddyn Cymru, Gwobr New Welsh Writing, Gwobr Ysgrifennu Newydd Wasafiri, Gwobr Cyfryngau Cymru, Gwobr Rising Stars Cymru, a Gwobr Cymru Greadigol.

Mae’r rhaglen ar agor i awduron sydd yn gweithio yn Gymraeg a Saesneg ar draws genres gwahanol – ffuglen, ffeithiol, ffeithiol greadigol a barddoniaeth – ac y 10 ymgeisydd llwyddiannus eleni yw:

SOPHIE CALON

Mae Sophie Calon yn awdures o Gaerdydd. Mae ei llyfr cyntaf, Long Going (Honno, 2025), yn gofiant am ei thad a oedd yn yfed. Fe werthwyd pob copi o Long Going o fewn pythefnos ac mae bellach ar ei bedwerydd argraffiad. Cafodd ei gynnwys yn un o bump o ddewision gorau blynyddol o Gymru gan The Bookseller, ac mae wedi’i ganmol gan awduron gan gynnwys Jacqueline Wilson, Louis de Bernières, ac Amy Liptrot. Mae Sophie wedi siarad am ei chofiant ar BBC Radio ac mewn mwy nag ugain o ddigwyddiadau, o siopau llyfrau ac amgueddfeydd i loches i’r digartref a gŵyl adferiad. Mae hi bellach yn ysgrifennu nofela wedi’i gosod ar y ffin Gymreig, lle mae’n byw gyda’i gŵr a’i merch. Mae Sophie yn cael ei chynrychioli gan Philip Gwyn Jones, Greyhound Literary. 

BEN HUXLEY

Mae Ben Huxley yn awdur ac yn newyddiadurwr sy’n byw ym Mae Colwyn. Yn canolbwyntio ar gemau fideo, mae ei ysgrifennu wedi’i gyhoeddi gan Radio Times, The Escapist, TechRadar, Live Science, WhatCulture, a’r elusen iechyd meddwl Safe in our World. Yn fuan ar ôl cwblhau ei MA mewn ysgrifennu creadigol ym Mhrifysgol Bangor, cafodd ei ddewis ar gyfer rhaglen Cynrychioli Cymru gan Lenyddiaeth Cymru. Yn ystod y flwyddyn honno gorffennodd ei nofel gyntaf. Yn 2024, cyhoeddwyd ei ffuglen fer yn (un)common: anthology of new Welsh writing, gyda Lucent Dreaming.

Yn angerddol dros roi llwyfan i leisiau sydd ar y cyrion, mae wedi mentora awduron ifanc ar gyfer Young Critics Conwy, ac yn 2026 lansiodd (Un)Common Magazine gyda chyd-awduron o’r un anian. Ochr yn ochr â’i waith golygyddol a newyddiaduraeth, mae Ben yn parhau i ysgrifennu ei fath unigryw o ffuglen: straeon swrrealaidd, doniol a thrist am bobl dosbarth gweithiol Cymru, gan gyffwrdd yn aml â niwroamrywiaeth a’r diwylliant gemau.

HOLLY MÜLLER

Mae Holly Müller yn awdures ac yn gerddor sy’n byw yn y Bannau Brycheiniog. Roedd ei nofel gyntaf My Own Dear Brother (Bloomsbury, 2016) yn Llyfr y Mis yn Waterstones ac enillodd adolygiadau cadarnhaol yn The Guardian, Independent, Sunday Times, Sydney Morning Herald ac eraill. Mae ei straeon byrion wedi’u cyhoeddi yn Rarebit (Parthian Books, 2013) a New Welsh Fiction (Seren Books, 2015). Enillodd Holly PhD mewn Ysgrifennu Creadigol o Brifysgol De Cymru lle bu’n addysgu myfyrwyr israddedig. Mae hi wedi ysgrifennu ar gyfer y wasg genedlaethol yn ogystal â chyhoeddiadau ar-lein, ac wedi perfformio yng Ngŵyl Cheltenham, Y Gelli, Talacharn, a Chaerdydd.

NAOMI PEARCE

Mae Naomi Pearce yn awdures sy’n byw yng Ngheredigion. Disgrifiwyd ei nofel gyntaf, Innominate (MOIST Books, 2023), gan Iain Sinclair fel “clasur o archaeoleg leol.” Gan dynnu ar gefndir mewn tecstilau, mae ei gwaith yn plethu hanesion ffeministaidd a chwiar, lle, ecoleg, a chelf. Mae hi wedi’i chyhoeddi yn British Art Studies, LA Review of Books, TON Magazine, a The White Review, ac wedi perfformio’n fyw yn Experimentica (Chapter, 2024) ac Y Tu Allan i’r Ffrâm | Out of the Frame (Llyfrgell Genedlaethol Cymru, 2025). Dewiswyd Naomi gan Lenyddiaeth Cymru ar gyfer carfan Ysgrifennu Ffuglen 2025 ac mae’n dysgu ymarfer rhyngddisgyblaethol ym Mhrifysgol Aberystwyth. Ar hyn o bryd mae’n ysgrifennu Western adolygol wedi’i gosod yng Ngorllewin Cymru, ynghyd â gwaith ffeithiol am fawnogydd, deurywioldeb, a gwleidyddiaeth o orwedd i lawr.

SILIVA ROSE

Mae Silvia yn awdures gyhoeddedig a anwyd, fagwyd ac yn byw ym mynyddoedd Eryri. Gan weithio ar draws ffeithiol greadigol, ffuglen a barddoniaeth, mae ei hysgrifennu’n cael ei siapio gan ei threftadaeth Gymreig a Serbeg, teithio a lle, ac iaith symbolaidd myth a chwedl. Yn 2023 fe’i dewiswyd yn Egin Awdur gan Lenyddiaeth Cymru ac fe’i rhestrwyd ar y rhestr fer ar gyfer Gwobr Stori Fer Rhys Davies. Ers hynny mae ei gwaith wedi ymddangos mewn amrywiaeth o gyhoeddiadau print ac ar-lein, gan gynnwys antholegau gan Parthian Books a Honno. Yn ddiweddar cafodd le ar raglen Cynrychioli Cymru 2025–26. Ochr yn ochr â’i gwaith ysgrifennu, mae’n gweithio fel hwylusydd creadigol yn cynnal gweithdai ac encilion ac yn Gyd-gyfarwyddwr Inclusive Journalism Cymru. 

EMILY PARADICE-RUAN 

Mae Emily Paradice-Ruan yn awdures awtoffuglen ac awdur a darlunydd llyfrau plant o Abertawe, ac mae ei gwaith yn archwilio cyfyngoldeb, perthyn, a chynrychiolaeth. Cyhoeddwyd ei stori fer gyntaf ‘Adref’ yn antholeg Rhaglen Fentora Bloomsbury 2024–25, lle cafodd ei rhestru’n fyr. Bu’n intern gyda Trill Magazine fel newyddiadurwr yn ymdrin â bywyd, cerddoriaeth, teithio, a thueddiadau, ac mae bellach yn dilyn MA mewn Ysgrifennu Creadigol ym Mhrifysgol Caerdydd. Mae Emily yn gweithredu fel cynorthwyydd addysgu mewn seminarau ysgrifennu creadigol israddedig ac yn olygydd rhyddiaith ac yn artist preswyl yn The Tonic Review, cylchgrawn llenyddol a redir gan ac ar gyfer myfyrwyr prifysgol Cymru. Ar hyn o bryd mae’n gweithio ar ei nofela Fledglings ac yn bwriadu dilyn PhD mewn Ysgrifennu Creadigol yng Nghymru.

CARYS SHANNON

Mae Carys Shannon yn wreiddiol o ogledd Gŵyr, Abertawe, ac mae bellach yn rhannu ei hamser rhwng Cymru a Phyreneau Sbaen. Mae ei straeon byrion wedi’u cyhoeddi gan Honno Press, Parthian Books a Mslexia Magazine, yn ogystal â chael eu darlledu ar BBC Radio 4. Cyhoeddwyd ei nofel gyntaf, Truth Like Water, gan Parthian Books ym mis Hydref 2025. Disgrifiwyd y nofel fel ‘stori gwbl afaelgar’, ‘gwaith hynod o gain ei ysgrifennu’ ac ‘enghraifft orau o Noir Cymreig’. Pan nad yw’n ysgrifennu, mae Carys ar ei hapusaf yn mwynhau amser araf yng nghanol natur fawreddog. 

STACEY TAYLOR

Mae Stacey Taylor yn awdures o Gaerdydd. Yn 2023 enillodd le ar raglen WriteNow Penguin Random House, ac mae wedi cael mentora gan olygydd yn Penguin, Michael Joseph. Fe’i dewiswyd ar gyfer rhaglen Awduron sy’n Datblygu gan The London Library ac fe’i chafodd ei chynnwys yn antholeg y rhaglen: From the Silence of the Stacks, New Voices Rise. Roedd hi hefyd yn rhan o garfan Cynrychioli Cymru 2023/24 gan Lenyddiaeth Cymru.

ROLANT TOMOS

Yn wreiddiol o Ddolgellau, mae Rolant Tomos bellach yn byw ym Mro Morgannwg. Mae wedi cyfarwyddo dramâu teledu, rhedeg bragdy a gweithio mewn nifer o swyddi eraill rhwng y ddau. Cyhoeddwyd ei nofel gyntaf ar gyfer bobol ifanc. Meirw Byw yn 2025, a Raaarrr yn 2026. Bydd Meirw Byw 2:Didudydd yn cael ei gyhoeddi eleni, ac yn 2027 bydd Brithdir, stori gowbois ar gyfer oedolion ar eich silffoedd. 

STEFFAN WILSON-JONES

Mae Steffan Wilson-Jones yn sgwennwr a chynhyrchydd theatr dwyieithog o Ddyffryn Clwyd, sydd bellach yn byw yn Nghaerdydd. Mae’n mwynhau pob math o ysgrifennu, gyda brwdfrydedd mawr am hunaniaeth Gymreig, comedi tywyll a gwleidyddiaeth. Mae Steffan wedi gweithio i Theatr Cymru fel Cynhyrchydd Cynorthwyol, wedi gweithio fel Cynhyrchydd Cynorthwyol ar y ffilm ‘Y Sŵn’ gan Roger Williams, a fel Golygydd Sgript ar Pobol y Cwm, yn ogystal a sgwennu pennod i’r rhaglen. Fe gafodd ei stori fer, Awrgym o Wawr, ei gyhoeddi yng nghyfrol Sebra, Pelydrau, yn 2025. Mi oedd yn aelod o Cynrychioli Cymru 2025-2026 (Llenyddiaeth Cymru) lle gafodd ei fentora gan Llwyd Owen, a bellach yn gweithio ar ei nofel gyntaf fydd yn cael ei gyhoeddi yn 2027, ac yn y camau cyntaf o sioe gerdd newydd gyda Cynyrchiadau Onnen. Mae’n edrych ymlaen i barhau i sgwennu ac ar gyfer y camau nesaf yn ei yrfa.